Vikumatseðill

Hér kemur matseðilinn þessa vikuna:

Mánudagur: matarboð 🙂

Þriðjudagur: gúllas og kartöflustappa

Miðvikudagur: fiskréttur með hrísgrjónum, rjómaosti og grænmeti

Fimmtudagur: taco pasta, sýrður rjómi, salat og doritos

Föstudagur: afgangar

Laugardagur: steikt hrísgrjón með kjúklingi, eggjum og grænmeti

Sunnudagur: bakaðar kartöflur með mexíkóskri kjúklingafyllingu

Endilega fylgið mér á instagram ef þið viljið fylgjast með þegar ég elda: glodis95

Kveðja Glódís

Sykurlaust afmæli

Ég hélt upp á afmælið mitt í gær með því að bjóða fjölskyldunni í smá kaffi, en þar sem ég er að taka sykurlausan september þá ákvað ég að reyna að hafa allt í afmælinu sykurlaust, eða allavega halda sykri í lágmarki. Það var alls ekki erfitt að finna sykurlausar uppskriftir á netinu en svo notaði ég líka nokkrar uppskriftir sem voru ekki sykurlausar en ég skipti bara út sykrinum fyrir gervisætu. Ég ætla að taka saman allt sem ég bauð upp á í afmælinu og vonandi geta einhverjir nýtt sér það.

Ostabakki

Ég var með lítinn ostabakka en flestir ostar og kex innihalda lítið af sykri. Ég var svo með vínber og sykurlausa jarðaberjasultu.

Mexíkóskur brauðréttur

Flestir brauðréttir innihalda lítinn sykur og því þarf oft ekkert að breyta uppskriftunum til að gera þá sykurlausa. Þetta er einn af mínum uppáhalds heitu brauðréttum og hann slær alltaf í gegn í öllum veislum. Uppskriftin er frá Gulur rauður grænn og salt: https://grgs.is/2016/03/10/8681/

Sykurlaus djús

Ég bauð upp á sykurlausan djús en þessi fæst í Nettó og er mjög góður. Ég blandaði hann í stórann drykkjarkút og setti niðurskornar appelsínur, sítrónur og lime, og fullt af klökum út í. Þetta var mjög ferskt og gott. Einnig bauð ég upp á nokkrar tegundir af sykurlausu gosi, en djúsið var lang vinsælast.

Djöflaterta

Þetta er uppskrift frá Lindu Ben en hana má finna hér: https://lindaben.is/recipes/alvoru-djoflaterta-med-besta-sukkuladi-kreminu/ Það eina sem ég gerði var að skipta út sykri fyrir sukrin, og flórsykri fyrir sukrin melis, og þá er kakan orðin sykurlaus, eða svo gott sem. Hún var æðislega góð, enda má sjá fingraför í kreminu ef myndin er skoðuð vel en dóttir mín var aðeins búin að stelast til að smakka áður en veislan byrjaði 😉

Frönsk súkkulaðikaka

Ég fékk þessa uppskrift hjá Sylviu Haukdal en kakan er bæði sykur- og hveitilaus og bragðast samt alveg eins og venjuleg frönsk súkkulaðikaka, dísæt og bráðnar uppí manni. Ég bar hana fram með þeyttum rjóma og ferskum jarðaberjum. Uppskriftina má nálgast hér: https://sylviahaukdal.is/sykur-og-hveitilaus-fronsk-sukkuladikaka/

Súkkulaðibita kökur

Þessi uppskrift er frá Lindu Ben en ég skipti út púðursykri og döðlusykri fyrir sukrin gold og notaði sykurlaust súkkulaði í staðin fyrir venjulegt. Þessi sykurlausu súkkulaðistykki fann ég í Nettó og þau voru mjög góð. Uppskriftina má nálgast hér: https://lindaben.is/recipes/orlitid-hollari-sukkuladibita-kokur/

Jarðaberja grísk jógúrt kaka

Þessi uppskrift er einnig frá Lindu Ben (já ég er dyggur aðdáandi!) en ég breytti þessari uppskrift nánast ekki neitt. Ég skipti bara út oreo kexinu fyrir sykurlaust kex sem lítur út og bragðast mjög svipað og oreo. Ég fann þetta kex í Nettó og það kom mér á óvart hvað það er gott og maður trúir því næstum ekki að það sé sykurlaust. Þessi kaka er ótrúlega fersk og góð og vegar upp á móti öllum dísætu kökunum þar sem hún er ekkert rosalega sæt. Mér finnst alltaf gott að bjóða upp á eina svona skyr- eða jógúrtköku í veislum til að vega upp á móti öllum sætindunum þar sem þær eru oftast ekki jafn sætar en hinsvegar mjög ferskar. Uppskriftina má nálgast hér: https://lindaben.is/recipes/einfold-jardaberja-grisk-jogurt-kaka-sem-tharf-ekki-ad-baka-og-er-merkilega-holl/

Marengsterta með jarðaberjum, súkkulaðikexi og karamellusósu

Marengs uppskriftin og karamellusósu uppskriftin eru frá Maríu Kristu og má nálgast hér: http://mariakristahreidarsdottir.blogspot.com/2014/03/ferming-framundan.html?m=1 Inn í marengsinn setti ég þeyttann rjóma með vanilludufti og hreinum stevia dropum og svo skar ég niður jarðaber og sykurlaust súkkulaðikex og blandaði saman við rjóman.

Rice krispies kaka með bananarjóma og karamellu

Þetta er bara þessi hefðbundna rice krispies kaka sem allir þekkja, nema ég skipti út nokkrum hráefnum til að gera hana sykurminni. Ég notaði sykurlaust súkkulaði í staðin fyrir suðusúkkulaði, og sykurlaust sýróp í staðin fyrir venjulegt, og svo gerði ég tvöfalda uppskrift af karamellusósunni frá henni Maríu Kristu hér fyrir ofan og setti annann helminginn ofan á marengsinn og hinn helminginn yfir rice krispies kökuna. Í rjóman setti ég vanilluduft, einn stappaðann banana og nokkra dropa af steviu.

Hrákaka

Þessari uppskrift breytti ég ekki neitt enda enginn viðbættur sykur í henni, aðeins holl og góð hráefni. Mesta snilldin við þessa köku er að hún er geymd í frysti og því er hægt að gera hana með margra daga fyrirvara og spara sér tíma. Ég skar svo bara afganginn af kökunni í litla bita og setti aftur inn í frysti og núna get ég alltaf nælt mér í einn bita ef mig langar í eitthvað sætt með kaffinu. Eins og sést á myndinni er ennþá smá frost í kökunni þegar myndin er tekin og þarf að muna að taka hana úr frysti allavega 15 mínútum áður en veislan hefst. Uppskriftin er frá Gulur rauður grænn og salt og hana má nálgast hér: https://grgs.is/recipe/himneska-hrakakan/

Athugið að færslan er ekki unnin í samstarfi við neinn en allar uppskriftirnar eru birtar með góðfúslegu leyfi frá höfundum og þakka ég þeim kærlega fyrir.

Kveðja Glódís

Vikumatseðill

Mér finnst best að útbúa matseðil fyrir heila viku í einu, svo geri ég innkaupalista út frá matseðlinum og reyni að versla bara inn einu sinni í viku. Það sparar bæði tíma og peninga að útbúa vikumatseðil auk þess sem maður sleppur við það að þurfa að ákveða hvað á að vera í matinn korter í sjö þegar allir eru orðnir svangir og pirraðir. Ég reyni að vera dugleg að deila vikumatseðlunum mínum á instagram og mun koma til með að deila þeim hér líka ef áhugi er fyrir því. Mér finnst að minnsta kosti alltaf gott að skoða vikumatseðla hjá öðrum til að fá innblástur og hugmyndir.

Hér kemur matseðilinn þessa vikuna:

Mánudagur: marineraður lax og couscous salat

Þriðjudagur: lasagna og ferskt salat

Miðvikudagur: afgangar

Fimmtudagur: kjúklinganúðlur

Föstudagur: grillaðir hamborgarar

Laugardagur: eitthvað gott 🙂

Sunnudagur: lambahryggur, kartöflubátar, salat, maísbaunir og brún sósa

Ég sýni oft frá því á instagram þegar ég elda kvöldmatinn og deili uppskriftum sem ég styðst við svo að ef þið hafið áhuga getið þið fylgst með mér þar: glodis95

Kveðja Glódís

Taco-panna, heimagert salsa og guacamole

Ég elska mexíkóskan mat, hann er svo djúsí og bragðgóður, og oftast ekkert mjög óhollur. Þessi réttur er einmitt þokkalega hollur, krakkarnir elska hann og hann er mjög einfaldur. Það er hægt að skella öllu inn í tortillavefju, nota nachos flögur til að skófla þessu upp í sig eða bara borða þetta með hnífapörum. Ég mæli með að bera þetta fram með svörtu doritosi, sýrðum rjóma og heilhveitivefjum.

Taco-panna:

1 pakki hakk

1/2 – 1 bréf Taco krydd

Salt, pipar og chilli flögur

1 dós niðursoðnir hakkaðir tómatar

1 dós maísbaunir

1 dós nýrnabaunir

Rifinn ostur

Aðfer: byrjið á að steikja hakkið á pönnu við háan hita. Þegar hakkið er tilbúið er hitinn lækkaður og hakkið kryddað með taco kryddi, salti, pipar og smá chili flögum. Næst er tómötunum bætt út á pönnuna og blandað saman við hakkið. Hellið vökvanum af maísbaununum og nýrnabaununum og setjið baunirnar með á pönnuna. Leifið þessu svo að malla við lágan hita á meðan meðlætið er útbúið. Alveg í lokin er rifnum osti stráð yfir pönnuna og leyft að bráðna. Berið réttinn fram á pönnunni.

Salsa:

2 stórir tómatar

1/2 rauðlaukur

1 gul paprika

1/3 gúrka

Salt

Aðferð: gúrkan er skorin endilöng í tvennt og miðjan hreinsuð úr með matskeið. Næst er allt grænmetið skorið niður mjög fínt og sett í skál, saltað og blandað vel saman.

Guacamole:

2 vel þroskuð og mjúk avacado

Sítrónusafi

Salt

Aðferð: stappið avacadoið með kartöflustappara eða gaffli þar til orðið að grófu mauki, þá er skvettu af sítrónusafa helt yfir, saltað og hrært vel saman.

Djúsí pasta & hvítlauksbrauð

Ég eldaði þennan pastarétt í gær og öllum fannst hann virkilega góður. Mér finnst þægilegt að skella í pastarétt því það er einfalt og fljótlegt, og frábær leið til að nýta hráefni sem er að verða komið á síðasta séns, til dæmis grænmeti sem er orðið slappt og kjötálegg eða ost sem er að verða kominn á síðasta söludag. Innihaldsefnin eru því alls ekkert heilög og ég mæli með að nota bara það sem til er hverju sinni.

Pastaréttur:

250 g pasta

Ólífuolía

Sjávarsalt

Steikingarolía

1 laukur

1 hvítlaukur lítill (eða eitt hvítlauksrif)

1 laukur

1/2 brokkolíhaus

1/2 blómkálshaus

1/2 rauð paprika

6 beikonsneiðar

2 lúkur skinkukurl

10 pepperóní

250 ml matreiðslurjómi

1/2 piparostur

1/2 mexíkóostur

Maizenamjöl

Hvítur pipar 

Svartur pipar

Sjávarsalt

Chili flögur

Hvítur pipar

Grænmetiskraftur

Aðfer:

Byrjið á að sjóða pastað samkvæmt leiðbeiningum, mér finnst best að nota heilhveiti pastaskrúfur en það má nota hvaða pasta sem er. Gott er að setja góða ólífuolíu og vel af sjávarsalti með í pottinn.

Skerið grænmetið smátt og steikjið við lágan hita upp úr góðri steikingarolíu, passið að nota stóra og djúpa pönnu svo að allt komsti fyrir. Á meðan grænmetið mallar á pönnunni er beikonið og pepperóníið skorið niður og bætt á pönnuna ásamt skinkukurlinu þegar grænmetið er orðið mjúkt. Rífið piparostinn og mexíkóostinn niður með rifjárni og bætið á pönnuna ásamt matreiðslurjómanum. Þegar osturinn er bráðnaður er sósan krydduð og smökkuð til, og svo þykkt með maizenamjöli. Mér finnst best að setja mikið af maizenamjöli og þynna svo sósuna með pastavatni þar til hún er orðin passlega þykk, þannig verður meira úr henni og hún bragðast betur. Þegar pastað er soðið er afgangs pastavatninu hellt af og sósan sett með pastanu í pottinn. Svo má leyfa þessu að malla við lágan hita á meðan hvítlauksbrauðið er útbúið.

Hvítlauksbrauð:

Mér finnst best að nota gott bakarísbrauð, til dæmis súrdeigsbrauð eða gróft brauð með mikið af kornum, en það er hægt að nota hvaða brauð sem er. Brauðsneiðunum er raðað á ofnplötu með bökunarpappír undir. Næst er íslenskt smjör sneitt niður með ostaskera og ein sneið af smjöri sett á hverja brauðsneið. Að lokum er settur ostur, annað hvort rifinn eða í sneiðum, á hverja brauðsneið og vel af hvítlaukskryddi stráð yfir. Þetta fer svo inn í ofn á 200 gráður þar til osturinn er bráðnaður.

Að finna tíma til að hreyfa sig

Það getur verið erfitt að finna tíma til að hreyfa sig þegar maður á börn, er í vinnu og/eða námi, og að reka heimili. Hver kannast ekki við það að borga fyrir kort í ræktina eða aðra hreyfingu, en hafa svo aldrei tíma til að mæta? Ég hef allavega gerst sek um það.

 Í janúar á þessu ári var ég búin að trassa það að mæta í ræktina í marga mánuði, einfaldlega vegna þess að ég hafði hvorki tíma né tök á að mæta. Svo fór allt of mikill tími í að koma sér í og úr ræktinni, pakka öllu draslinu ofaní tösku, redda pössun eða drösla krökkunum með o.s.frv. En ég fann að ég þurfti að koma hreyfingu aftur í mína daglegu rútínu, það gerir svo ótrúlega mikið fyrir andlegu heilsuna, fyrir utan það auðvitað að stuðla að líkamlegu heilbrigði. Ég fór að leita að lausn og datt í hug að skoða heimaæfingar. Þannig gæti ég æft á morgnana áður en stelpurnar vakna, eða seinnipartinn með stelpurnar heima, og jafnvel á kvöldin.

Þegar ég hugsaði um heimaæfingar sá ég samt bara fyrir mér fáar og ófjölbreyttar æfingar með eigin líkamsþyngd og hélt að það yrði hundleiðinlegt og ekki nógu krefjandi. En ég prufaði að leita að öppum með heimaæfingum og fann eitt sem heitir Nike Training. Þar er fjöldi æfinga sem hægt er að gera heima, bara með æfingadýnu og eigin líkamsþyngd. Ég prufaði appið og fílaði það í botn, æfingarnar eru bæði skemmtilegar og krefjandi, og það er hægt að gera þær hvar og hvenar sem er. 

Ég kom æfingunum inn í mína daglegu rútínu og líkaði það svo vel að æfa heima að ég fór að svipast um eftir tækjum til að gera æfingarnar enn fjölbreyttari. Ég keypti notaða skíðavél og notað þrekhjól á netinu fyrir lítin pening, svo tók ég til í bílskúrnum og útbjó lítið „heimagym“.

 Í byrjun sumars var ég búin að vera dugleg að taka heimaæfingar í hálft ár, og sá að þetta var eitthvað sem ég gæti hugsað mér að halda áfram að gera í framtíðinni. Ég ákvað þess vegna að kaupa mér nokkur handlóð og æfingateygjur, og svo fékk ég lánaða ketilbjöllu hjá mömmu. Núna get ég tekið bæði fjölbreyttar lyftingaæfingar, og þolæfingar með eigin líkamsþyngd, og ég hlakka alltaf til að komast inn í bílskúr að æfa. Þetta er orðinn minn „me time“ og mesta snilldin er að ræktin mín er alltaf opin og ég þarf bara að labba inn í bílskúr, þarf ekki að eyða neinum tíma í að ferðast á milli staða eða pakka niður í tösku, ekkert vesen. Svo þegar ég er ein með stelpurnar þá færi ég bara hjólið inn í stofu og hjóla á meðan þær horfa á barnatímann, eða fer með æfingadýnuna fram og tek æfingu þar og leyfi þeim jafnvel að vera með, þeim finnst það algjört sport. 

Ef þið eruð í sömu sporum og ég, eigið erfitt með að finna tíma eða fá pössun, og viljið spara ykkur pening í leiðinni, þá mæli ég með að skoða það að æfa heima. Það er til fullt af sniðugum öppum, og ég mæli sérstaklega með því að prufa Nike Training en það kostar ekkert og er fyrir byrjendur jafnt sem lengra komna. Ég reyni að vera dugleg að sýna frá heimaæfingunum mínum á instagram og áhugasamir geta fylgst með mér þar.

Kveðja Glódís

Instagram: glodis95